Relationships Tradition

အုန်းပွဲ ငှက်ပျောပွဲနဲ့သာ မောင်တောင်းလှည့်ပါ။

တောင်းရမ်းလက်ထပ် မင်္ဂလာဆိုတာ ဒီလိုလုပ်ရတာကိုး… 

မိန်းကလေးတို့ရဲ့ တစ်သက်တစ်ခါမင်္ဂလာလို့ ပြောကြတဲ့ မင်္ဂလာပွဲကို ဆင်နွှဲကြမဲ့ အချိန်အခါမှာ ရိုးရာဓလေ့အတိုင်း တောင်းရမ်းမှုကလည်း အမျိုးသမီးတစ်ယောက်ကို လေးစားမှု တန်ဖိုးထားမှုကို ပြသရာ ရောက်ပါတယ်။ ဓလေ့ထုံးတမ်းစဉ်လာတွေအရ တောင်းရမ်းတဲ့ပုံစံအမျိုးမျိုးရှိပေမဲ့ ယောင်းတို့အတွက် အက်ဒ်မင့်ရဲ့ ရိုးရာတောင်းရမ်းပွဲ အတွေ့အကြုံလေးကို ပြောပြချင်တယ် ယောင်းရေ… ပြီးတော့ ဘာတွေ တိုင်ပင်ရမလဲ ဆိုတာရောပေါ့…

တောင်းရမ်းပွဲလုပ်ဖို့ ရက်ရွေးထားပါ

ပထမဆုံး ဘယ်နေ့မှာ ယောင်းရဲ့ ချစ်သူကလာရောကတောင်းရမ်းမှာလဲဆိုတာ အရင်ဆုံးတိုင်ပင်ထားပါ ယောင်းရေ။ နှစ်ဦးသားလက်တွဲဖို့ ပထမဆုံး ပြုလုပ်ရတဲ့ပွဲဆိုတော့ ရက်ကောင်းရက်သာလေးတွေရွေးပြီး နှစ်ဘက်မိဘအဆင်ပြေမယ့်နေ့လေးကို ပြုလုပ်သင့်တယ်နော်။

<3

ချစ်သူ အမျိုးသားဘက်က ပြင်ဆင်ရမဲ့ တောင်းရမ်းပစ္စည်းများ

သတို့သမီးတောင်းရမ်းတဲ့ အုန်းပွဲ ငှက်ပျောပွဲမှာ ပါဝင်မည့်ပစ္စည်းတွေကတော့ ရွှေငှက်ပျော ဒါမှမဟုတ် ရခိုင်ငှက်ပျော ၃ဖီး (ရွှေငှက်ပျောနဲ့ တောင်းရမ်းကြသလို ရရင် ခိုင်မြဲအောင်ဆိုတဲ့ အဓိပ္ပာယ်နဲ့ ရခိုင်ငှက်ပျောကို အသုံးပြုတဲ့သူတွေလည်း ရှိပါတယ် ယောင်းတို့စိတ်ကြိုက်ပေ့ါနော်)
အုန်းသီးလှလှလေး ၁လုံး
ကွမ်းယာ ၉ယာ (ပွဲထဲမှာထိုး)
ပန်း ၅ မျိုး (အက်မင်တို့တုန်းကတော့ နှင်းဆီ၊ စံပါယ်၊ ရွှေပန်း၊ ငွေပန်း နဲ့ သပြေပန်းတို့ကို ငှက်ပျောပွဲမှာ အလှဆင်ထားပါတယ်)
လက်ဖက်အုပ် (လက်ဖက်၊ ကြက်သွန်ကြော်၊ နှမ်း)
နံ့သာရည် နဲ့ သပြေခက် (ငွေဖလား အသေးထဲ နံ့သာရည်ထည့်ပြီး သပြေခက်စိုက်)
တောင်းရမ်းမဲ့ ငွေကြေး နဲ့ လက်စွပ် (ဒါကတော့ ယောင်းတို့နှစ်ဦးတိုင်ပင်ထားရမှာပါ မင်္ဂလာဆောင်ဖို့ တင်တောင်းတဲ့ငွေကြေးတစ်ခါတည်းထည့်မှာလား ဒါမှမဟုတ် လက်စွပ်စွပ်ပြီး အသိအမှတ်ပြုမှာလား သတို့သမီးအတွက် သတို့သားမိဘကပေးတဲ့လက်ဆောင်ရှိမှာလားဆိုတာတွေက သတို့သားဘက်ရဲ့ တင်တောင်းမှုမှာ မူတည်ပါတယ်)
အပေါ်က ပြောပြခဲ့တဲ့ သတို့သမီးတောင်းရမ်းပစ္စည်းတွေကို ယောင်းရဲ့ ချစ်သူအမျိုးသားဘက်က စီစဉ်ခဲ့ရမှာပါ။ နောက်ပြီး အဲဒီ အုန်းပွဲငှက်ပျောပွဲကို ရွက်လာရမယ့်သူကတော့ သတို့သားဘက်က ဆွေမျိုးအမျိုးသမီးကြီး (သားဦးမွေးထားတဲ့သူဆို ပိုကောင်းတယ်ဆိုတဲ့ ဓလေ့ရိုးရာလေးရှိတယ် ဆိုတာကို အက်မင်တို့ မင်္ဂလာဆောင်တုန်းက ကြားခဲ့ဖူးတယ်) ဒါမှမဟုတ် ယောင်းချစ်သူရဲ့ မိခင်လည်း ရွက်လာလို့ရပါတယ်။ သူတို့ဘက်ကလဲ သူတို့ရပ်ကွက်ရဲ့လူကြီး၊ မင်္ဂလာလမ်းကြောင်းပေးမယ့် လူကြီး၊ မိတ်ဆွေ အပေါင်းအသင်းတွေကို ခေါ်လာရမှာပါ။

အက်ဒ်မင်တို့ တောင်းရမ်းမင်္ဂလာပွဲတုန်းက

Related Article >>> လက်မထပ်ခင် ဆွေးနွေးတိုင်ပင်

ကဲ ယောင်းရဲ့ချစ်သူအမျိုးသားဘက်ကို ပြောပြီးပြီဆိုတော့ ယောင်းတို့ဘက်ကပြင်ဆင်ထားရမှာလေးတွေ ကြည့်ကြရအောင်..

ငွေဖလားနဲ့ ပန်းအိုးအလှ ၂အိုးလောက်ကို ညီအစ်မတွေ သူငယ်ချင်းတွေနဲ့ အတူတူထိုးပေးထားပါ။
ဧည့်သည်တွေကို ဧည့်ခံမယ့် မုန့်နဲ့ ကော်ဖီတွေ (ဒါကတော့ကိုယ် နှစ်သက်ရာကျွေးနိုင်ပါတယ်)
ဧည့်ခံမဲ့ လက်ဖက်ပွဲ
မင်္ဂလာလက်ဆောင် (ဒါကတော့ သတို့သားဘက်ကလိုပဲ ယောင်းတို့ဘက်ကပေးမဲ့ လက်ဆောင်ပစ္စည်း ဒါမှမဟုတ် လက်ဖွဲ့ငွေတွေကို မိဘတွေက ပေးမယ်ဆိုရင် တခါတည်းပြင်ဆင်ထားဖို့လိုလိမ့်မယ်နော်)
ခေါ်ထားရမဲ့ ဧည့်သည်တွေကတော့

  • တောင်းရမ်းပွဲကို လက်ခံမဲ့ အမျိုးသမီးကြီး (အပေါ်က သတို့သားအတိုင်း သားဦးမွေးတဲ့သူဆို ပိုကောင်းပါတယ် ဒါပေမဲ့ ကိုယ့်သဘောအတိုင်း ကိုယ့်ရိုးရာနဲ့တော့ လုပ်လို့ရပါတယ်)၊
  • ရပ်ကွက်လူကြီးတွေ
  • မင်္ဂလာစကားပြောပေးမယ့်လူကြီး
  • မိတ်ဆွေအပေါင်းအသင်းတွေကို ခေါ်ထားရမယ်နော်
    ဒါတွေကတော့ ယောင်းချစ်သူနဲ့ ယောင်းတို့ဘက်က ပြင်ဆင်ထားရမဲ့ အကြောင်းအရာတွေပေါ့။

တောင်းရမ်းရက်ရောက်ပြီဆိုရင် သတ်မှတ်ထားတဲ့အချိန်မတိုင်ခင် ယောင်းတို့အိမ်မှာ ဧည့်သည်လူကြီးတွေကို ခေါ်ထားရမှာပါ။ ယောင်းရဲ့ ချစ်သူနဲ့ ဧည့်သည်လူကြီးတွေ ရောက်ပြီဆိုတာနဲ့ အုန်းပွဲငှက်ပျောပွဲကို ရွက်လာတဲ့အမျိုးသမီးကြီးက အရှေ့ဆုံးကနေလာရမှာဖြစ်ပြီး အိမ်အပေါက်ဝရောက်ပြီဆိုတာ ပွဲလက်ခံမဲ့ ယောင်းဘက်က လက်ခံသူက မေးခွန်းသုံးခုမေးရမှာဖြစ်ပါတယ်။

မေးခွန်းလေးတွေက

ရွှေပါလား ငွေပါလား (အဖြေ – ရွှေလည်းပါတယ် ငွေလည်းပါတယ်)

အပေါ်ကလာတာလား အောက်ကလာတာလား (အဖြေ – အပေါ်ကလာတာပါ)

ဆင်စီးလာလား မြင်းစီးလာလား (အဖြေ – ဆင်စီးလာတာပါ)

အဲ့ဒီမေးခွန်းလေးတွေကို ဖြေပြီးမှ တောင်းရမ်းအုန်းပွဲ၊ငှက်ပျောပွဲကို ယောင်းဘက်က လက်ခံယူမှသာ ပွဲကလက်ခံတယ်ဆိုတဲ့ သဘောကို သက်ရောက်မှာဖြစ်ပါတယ်။

Related Article >>> ချစ်သူစုံတွဲတွေ လက်မထပ်ခင် ကြိုတင်တိုင်ပင်ဆွေးနွေးသင့်သည့် အကြောင်းအရင်း(၅)မျိုး

သတို့သမီးတောင်းရမ်းမှုကို လက်ခံပြီးပြီဆိုရင်တော့ သတို့သားဘက်ကနေ မင်္ဂလာလမ်းကြောင်းစကားပြောရမှာပါ။ သတို့သားဘက်ကပြောပြီးပြီဆိုရင် ယောင်းဘက်က မင်္ဂလာစကားကိုပြောမဲ့ လူကြီးက ဆုံးမစကား စတာတွေကို ပြောပေးမှာဖြစ်ပါတယ်။ ဂါရဝတရားမင်္ဂလာစကားတွေ ပြောပြီးပြီဆိုရင် မင်္ဂလာရက်၊ မင်္ဂလာပွဲကို သတ်မှတ်ပြီး လက်ဖွဲ့ပစ္စည်းပါရင် လက်ဖွဲ့ပစ္စည်းပေးရမှာဖြစ်ပါတယ်။ မပါရင်လည်း မင်္ဂလာရက်နဲ့ မင်္ဂလာပွဲပဲသတ်မှတ်ရင်ရပါတယ်။

မင်္ဂလာတောင်းရမ်းမှုအထမြောက်သွားပြီဆိုရင်တော့ နှစ်ဘက်မိဘတွေက မင်္ဂလာသတို့သားနဲ့ သတို့သမီးကို သပြေခက်နဲ့ နံ့သာရည်ဖြန်းပက်ပေးရမှာပါ။ ပြီးရင်တော့ နှစ်ဖက်မိဘဆွေမျိုးလူကြီးတွေကို မင်္ဂလာမောင်နှံနှစ်ဦး ဂါဝရပြုကန်တော့ကြရမှာဖြစ်ပါတယ်။ အဲဒီနောက်မှာတော့ ဧည့်သည်ဆွေမျိုးလူကြီးမိဘတွေကို အသိအမှတ်ပြု လက်ဖက်ကျွေးပြီးပြီဆိုရင်တော့ ယောင်းတို့နှစ်ဦးရဲ့ တောင်းရမ်းမင်္ဂလာက အောင်မြင်စွာပြီးမြောက်ပါပြီ ယောင်းရေ… အားလုံးပြီးပြီဆိုရင်တော့ ယောင်းတို့ထိုးထားတဲ့ ပန်းအိုးတွေ၊ တောင်းရမ်းအုန်းငှက်ပျောပွဲနဲ့ ယောင်းတို့ချစ်သူနှစ်ဦး အလှဓါတ်ပုံလေးတွေ ရိုက်လို့ ရပြီပေါ့နော် (ဒါကအရေးအကြီးဆုံးမဟုတ်လား 😛 ) ဒီအတွက်လည်း ယောင်းတို့ရဲ့ ပွဲအစအဆုံးကို မှတ်တမ်းတင်ထားဖို့ သူငယ်ချင်းမိတ်ဆွေတွေကို အကူအညီတောင်းထားဖို့ မမေ့နဲ့ဦးနော်..

ကိုယ့်ချစ်ရတဲ့သူက အိမ်မှာလာရောက်တောင်းရမ်းမှာကို အလှတွေပြင်ပြီးစောင့်နေတဲ့ယောင်းရဲ့ ရင်ခုန်မှုက ဘာနဲ့မှတန်ဖိုးမဖြတ်နိုင်ဘဲ အဲဒီအချိန်လေးတွေက မပြောပြတတ်အောင် စိတ်လှုပ်ရှားရင်ခုန်လှိုက်မောရမှာ မလွဲဘူးယောင်းရေ။ ချစ်ရတဲ့ယောင်းတို့လည်း ပျော်ရွှင်ချမ်းမြေ့စရာ တောင်းရမ်းမင်္ဂလာလေးကို ချစ်တဲ့သူတွေနဲ့ ဆင်နွှဲနိုင်ကြပါစေ။

May ( For Her Myanmar )

Leave a Reply

Your email address will not be published. Required fields are marked *