လမ်းခွဲဖို့ကို မကြောက်ပါနဲ့

လမ်းခွဲလိုက်ရင် ငါနေနိုင်ပါ့မလား?

ပိန်သူဖြစ်ဖြစ် ဝသူဖြစ်ဖြစ် ရုပ်လှတဲ့သူ ဖြစ်ဖြစ် မလှတဲ့ သူဖြစ်ဖြစ် အက်ဒ်မင်တို့အားလုံးဟာ ချစ်ခြင်းမေတ္တာကို ခံစားတတ်ကြသူ၊ ချစ်ခြင်းမေတ္တာနဲ့ ထိုက်တန်ကြသူတွေချည်းပါ။ နောက်ပြီး no man is an island (လူဟာတစ်ယောက်တည်း မရှင်သန်နိုင်ဘူး) ဆိုတဲ့စကားလည်း ရှိသေးတယ်မလား။

ဒါကြောင့်လည်း relationshipတစ်ခုကို စတင်တာဟာ ချစ်တတ်တဲ့ သဘာဝကြောင့်လို့ ဆိုနိုင်သလို “ကိုင်းကျွန်းမှီ ကျွန်းကိုင်းမှီ”ကြဖို့ လို့လည်း ဆိုနိုင်ပါတယ်။

ဒါပေမဲ့ ကိုယ်ရွေးချယ်လိုက်တဲ့ ချစ်ခြင်းမေတ္တာဟာ ကိုယ့်ကို စိတ်သောကပဲ ပေးတဲ့အခါ၊ ကိုယ့်ဘက်က ပေးဆပ်ရသလောက် သူ့ဘက်ကပြန်ပေးတာ ပင်ပန်းမှုတွေပဲ ဖြစ်နေတဲ့အခါ ဒီ relationshipကို အဆုံးသတ်ရဲတဲ့ သတ္တိရှိဖို့ လိုလာပါပြီ။

ဆိုပေမဲ့လည်း တစ်ခါတလေမှာ အက်ဒ်မင်တို့ဟာ အကြောင်းအရင်းတချို့ကြောင့် လမ်းခွဲရမှာကို ကြောက်ရွံ့နေတတ်ကြပါတယ်။

နံပါတ်(၁) အကြောင်းရင်း ကတော့ ကိုယ့်ဘက်ကစပြီး အဆုံးသတ်လိုက်တဲ့ relationshipကြောင့် ကိုယ်ဟာ မကောင်းတဲ့သူ၊ ပွေရှုပ်တဲ့သူ လို့ အများအမြင်မှာ အထင်သေးခံရမှာကို ကြောက်တာပါ။

အက်ဒ်မင်တို့ဟာ ဒီ လူနဲ့ ပြတ်ပြီး နောက်တစ်ယောက်နဲ့ စတင်မိတဲ့အခါ တန်ဖိုးမရှိတဲ့မိန်းမ၊ ရည်းစားများတဲ့ မိန်းမ လို့ သမုတ်ခံရမှာ သိပ်ကြောက်တတ်ကြပါတယ်။ ရှေးဆန်တဲ့ လူကြီးတွေကိုယ်တိုင်က ဒါမျိုးဆို သိပ်ဆုံးမကဲ့ရဲ့တတ်ကြတာကိုး။ ဒါကြောင့်လည်း ဒီစိတ်ညစ်စရာကောင်းတဲ့ relationshipထဲမှာပဲ ကြိတ်မှိတ်ပြီး ကျန်ရှိနေတတ်ကြပါတယ်။

တကယ်တော့ “တစ်ယောက်ဆို တစ်ယောက် ပိတောက်ဆို ပိတောက်” ဆိုတဲ့ စကားဟာ ရုပ်ရှင်တွေ၊ ဝတ္ထုတွေမှာပဲ ရှိပြီး အပြင်လောကမှာတော့ သိပ်လက်တွေ့မကျလှပါဘူး။

ယောင်းတို့သိထားဖို့က အက်ဒ်မင်တို့ အားလုံးမှာ ကိုယ့်ရဲ့ ကိုယ်ရေးကိုယ်တာဆိုင်ရာ အကြောင်းအရာတွေကို လွတ်လွတ်လပ်လပ် ဆုံးဖြတ်ပိုင်ခွင့် ရှိပါတယ်။ ဘယ်သူကမှ ယောင်းတို့ရဲ့ ကိုယ်ရေးကိုယ်တာ ဆုံးဖြတ်ချက်ကို ဝေဖန်ချိုးဖောက်ပိုင့်ခွင့်မရှိပါဘူး။ ကိုယ့်ရဲ့ ကံကြမ္မာကို ကိုယ်သာ ဖန်တီးခွင့်ရှိတာမို့ ပတ်ဝန်းကျင်ကို ဂရုမစိုက်ဘဲ relationshipတစ်ခုရဲ့ အဆုံးသတ်ကို သင့်တော်သလို လွတ်လွတ်လပ်လပ် ဆုံးဖြတ်သင့်ပါတယ်။

နံပါတ်(၂) အကြောင်းရင်းကတော့ ကိုယ့်ကြောင့် တစ်ဘက်လူ အရမ်းထိခိုက်သွားမှာကို စိုးရိမ်အားနာတာပါ။

“သူက ငါ့ကို အရမ်းချစ်တဲ့သူဆိုတော့ ငါဒီလိုလုပ်လိုက်ရင် သူအရမ်းထိခိုက်သွားလိမ့်မယ်၊ ခံစားသွားရလိမ့်မယ်” ဆိုတဲ့ အတွေးတွေဟာ လမ်းခွဲဖို့ ဆုံးဖြတ်ချက်ကို တွန့်ဆုတ်စေပါတယ်။

တကယ်တော့ ချစ်တယ်ဆိုတဲ့ အပြောချိုချိုလေးကို ပါးစပ်က တဖွဖွပြောနေရုံနဲ့ ” တကယ်ချစ်တာပဲ”လို့ ယူဆလို့မရပါဘူး။ အပြောနဲ့ လက်တွေ့က တလွဲစီဖြစ်နေရင်တော့ ၊ သူ့လုပ်ရပ်တွေဟာ ကိုယ်မျှော်မှန်းထားသလို ဖြစ်မလာဘဲ စိတ်ညစ်ရစေတယ်ဆိုရင်တော့ အားမနာဘဲ အဆုံးသတ်ပစ်ရမှာ ဖြစ်ပါတယ်။

ကိုယ် စိတ်အညစ်ခံပြီး ဒီrelationship ထဲမှာ ဆက်နေတာဟာ ရေရှည်မှာ သူ့အတွက်ကော၊ ကိုယ့်အတွက်ပါ မကောင်းပါဘူး။ အချိန်ကြာရင် ကြာသွားသလို ပိုခံစားရမှာဖြစ်လို့ အချိန်မဆွဲဘဲ အဆုံးသတ်သင့်ပါတယ်နော်။ ဒါကြောင့် မပျော်ရွှင်တော့တဲ့ relationship တစ်ခုကို အဆုံးသတ်လိုက်တာဟာ ရေရှည်မှာ နှစ်ယောက်လုံး ကောင်းဖို့အတွက်ဆိုတာ ကို သတိရပေးပါ။

Related Article >>> အပြုံးနဲ့ပဲ လမ်းခွဲရအောင်

နံပါတ်(၃) အကြောင်းရင်းကတော့ ဒီrelationshipကို အဆုံးသတ်လိုက်တဲ့အခါ ကိုယ့်ဘက်က အရမ်းအထီးကျန်သွားမှာ ကြောက်ရွံ့တာပါ။

“ငါတစ်ယောက်တည်း ဒီဘဝကြီးကို ဖြတ်သန်းနိုင်ပါ့မလား ” ဆိုတဲ့ အတွေးဟာ အထီးကျန်မှာကို ကြောက်ရွံ့တဲ့ ယောင်းတို့အတွက်တော့ အတော်လေး ကြေကွဲစရာကောင်းနိုင်ပါတယ်။ အထူးသဖြင့် အင်မတန် ကြာရှည်တဲ့ အမှတ်တရ နေ့ရက်တွေကို ဖန်တီးခဲ့ကြတဲ့ ချစ်သူတွေဆို လမ်းခွဲဖို့ကို ပိုပြီး ကြောက်ရွံ့ကြပါတယ်။

ဒါကြောင့်လည်း အထီးကျန်ပြီး ကြေကွဲရမှာ ထက်စာရင် မပျော်ရွှင်တော့တဲ့ relationshipကို ဆက်သည်းခံပြီး နေတာကမှ တော်ပါဦးမယ်လို့ စဉ်းစားပြီး ကြိတ်မှိတ်သည်းခံတတ်ကြပါတယ်။

ယောင်းတို့မေ့နေတာက “အချိန်ဆိုတာ စိတ်ဒဏ်ရာကို ကုစားနိုင်တဲ့ အကောင်းဆုံး ဆေး” ဆိုတာပါပဲ။ ယောင်းတို့ရဲ့ ကြေကွဲမှုကို အချိန်က ကုစားသွားမှာ ဖြစ်လို့ လတ်တလောတော့ ကြေကွဲအထီးကျန်ရမှာ ဖြစ်ပြီး နောင်တစ်ချိန်မှာတော့ ဒီကိစ္စတွေကို ပြန်ကြည့်တဲ့အခါ ဘဝရဲ့ သင်ခန်းစာတစ်ခုထက် မပိုတာကို တွေ့ရမှာပါ။

နောက်ပြီး လှံထမ်းလာတာကို မြင်ရပေမဲ့ ကံထမ်းလာတာကိုတော့ ဘယ်သူမှ မမြင်ရပါဘူး။ ဒါကြောင့် ယောင်းတို့ အနေနဲ့ လမ်းခွဲလိုက်တဲ့အခါ တကယ်ပဲ အထီးကျန်ပြီး ကြေကွဲနေရမှာလား၊ ပိုကောင်းတဲ့သူတစ်ယောက်နဲ့ တွေ့ပြီး စိတ်ချမ်းသာရမှာလား ဆိုတာ ဘယ်သူမှ မသိနိုင်ပါဘူး။

ဒါကြောင့် relationship တစ်ခုဟာ ကိုယ်မျှော်မှန်းသလို အလုပ်မဖြစ်တော့တဲ့အခါ၊ စိတ်ညစ်ရတာတွေပဲ များလာတဲ့အခါ ရဲရဲဝံ့ဝံ့သာ လမ်းခွဲလိုက်သင့်ပါတယ်။ တစ်ခါတလေ ပိုကောင်းတဲ့ ဘဝအချိုးအကွေ့တွေကို ဖန်တီးဖို့ သတ္တိရှိဖို့တော့ လိုပါတယ်။

ဒါဟာ မပျော်ရွှင်တော့တဲ့ ကိုယ့်ကိုယ်ကိုယ်သာမက သူ့ကိုပါ ပိုကောင်းတဲ့သူတစ်ယောက်နဲ့ တွေ့ဆုံနိုင်အောင် လွှတ်ပေးလိုက်တာပါပဲ။

နောက်ပြီး ကိုယ့်ဘဝဟာ ကိုယ်ကိုယ်တိုင်သာ ဖြစ်ပြီး သူဟာ ကိုယ့်ဘဝကြီး မဟုတ်ဘူးဆိုတာကို သတိရစေချင်ပါတယ်။

ယောင်းတို့အားလုံးဟာ ပျော်ရွှင်မှုနဲ့ ချစ်ခြင်းမေတ္တာကို အပြည့်အဝထိုက်တန်သူတွေပါ လို့ ပြောကြားရင်း….

By
Mia (For Her Myanmar)

Reference links: bustle , Care 2

No Comments Yet

Comments are closed