Academic Writing အေၾကာင္း သိေကာင္းစရာ

အဂၤလိပ္စာေရးနည္းအမ်ိဳးမ်ိဳးထဲကမွ Academic Writing ဆိုတာ ဦးေႏွာက္အစားဆံုး နဲ႔ အႏၱရာယ္အမ်ားဆံုးေရးနည္းဆိုေတာ့ကာ….

ေယာင္းတို႔ေရ.. ဒီေန႔အတြက္ေတာ့ ေယာင္းတို႔အတြက္ လုပ္ခန္းခြင္အတြက္ေရာ ပညာေရးအတြက္ပါ ေတာ္ေတာ္ေလးအသံုးဝင္တဲ့ စာေရးနည္းေလးတစ္ခုနဲ႔ မိတ္ဆက္ေပးခ်င္တယ္။ အဲဒါကေတာ့ Academic Writing တဲ့။ ဘာသာျပန္ရရင္ေတာ့ အဆင့္မီ အဂၤလိပ္စာအေရးအသားေပါ့။ ေယာင္းတို႔ ျမင္ေတြ႕ေနက်ျဖစ္တဲ့ ဝတၳဳေတြ၊ ကဗ်ာေတြ၊ သတင္းစာေတြ၊ ေၾကာ္ျငာ အေရးအသားေတြနဲ႔ေတာ့ မတူဘူးေပါ့ေနာ္။ Academic Writing ကို မဟာဘြဲ႔အတြက္ ျပဳစုရတဲ့ စာတမ္းႀကီးေတြ၊ လုပ္ငန္းသေဘာအရ ေရးရတဲ့ Proposal ေတြ၊ သုေတသနစာတမ္းေတြအတြက္ သံုးၾကပါတယ္။ အထူးသျဖင့္ ပညာေရးပိုင္းမွာေပါ့။

Academic writing က ဘာလို႔ေခါင္းစားရတာလဲဆိုရင္ ဟိုက္ဖန္ေလး၊ ဒက္ခ်္ေလး၊ ေကာ္မာေလး၊ ဆီမီေကာ္လံု အသံုးေလးက အစသတိထားရတယ္။ စကားလံုးအသံုးအႏႈန္းေရြးခ်ယ္မႈကလည္း ပညာရွင္ဆန္ရတယ္။ ေျပာရရင္ေတာ့ ေန႔စဥ္သံုးစကားလံုးေတြသံုးလို႔ မသင့္ေတာ္တာေပါ့။ ျမင္ေအာင္ ဥပမာေပးရမယ္ဆိုရင္ တည္ေထာင္သည္ ဆိုတဲ့အသံုးမွာ Build ကိုသံုးမယ့္အစား establish ဆိုတဲ့စကားလံုးကို သံုးလိုက္တာမ်ိဳး၊ ျငင္းပယ္သည္ဆိုတဲ့ေနရာမွာ refuse ကို သံုးမယ့္အစား decline ဆိုတဲ့စကားလံုးကို သံုးလိုက္ရတာမ်ိဳးေတြေပါ့။ အဓိပၸါယ္ကအတူတူပဲ။ အသံုးအႏႈန္းပဲကြာသြားတာေပါ့။

Related article >>> အဂၤလိပ္လို Presentation လုပ္ၾကတဲ့အခါ ဘယ္လုိ ႀကိဳတင္ျပင္ဆင္ရမလဲ?

ေနာက္တစ္ခုက သတိထားရမွာက Academic writing မွာ phrasal Verb လို႔ေခၚတဲ့ verb+preposition အတြဲကို မသံုးမိေစဖို႔ပါ။ ဥပမာ Put of the fire အစား extinguish the fire လို႔သံုးတာ ပို academic ဆန္တဲ့ သေဘာေပါ့။ ေနာက္ၿပီး အတိုေကာက္စကားလံုးေတြ – don’t, can’t, I’m, you’re အစရွိသျဖင့္ အတိုခ်ဳပ္ထားတဲ့ စကားလံုးေတြ သံုးဖို႔မသင့္ပါဘူး။ ဆိုေတာ့ အဲဒါေတြအစား do not, cannot, I am, you are တို႔လိုမ်ိဳးပဲ သံုးေပးဖို႔ အားေပးပါတယ္။

slang လို႔ေခၚတဲ့ ေခတ္ေပၚအသံုးေတြကိုကေတာ့ လံုးဝေရွာင္ႏိုင္ေလေကာင္းေလပါပဲ။ Academic paper တစ္ေစာင္မွာ အဲဒီလိုစကားလံုးမ်ိဳးေတြ ေတြ႕ရတာ အင္မတန္မွ အက်ည္းတန္ပါတယ္။ စာဖတ္သူ၊ စာစစ္သူအေပၚမွာ အေလးမထားဘူးဆိုတဲ့အထိ ေကာက္ခ်က္ဆြဲလို႔ရႏိုင္တဲ့အထိ သတိထားရမယ့္ အသံုးအႏႈန္းပါ။ သံုးခ်င္သပဆိုရင္ေတာ့ Idiom ကို သံုးေပးလို႔ရပါတယ္။ ဒါေပမဲ့ အခ်ိဳ႕ Idiom အသံုးေတြကလည္း informal ျဖစ္ေနဆဲမို႔ ကိုယ့္စကားလံုးေရြးခ်ယ္မႈအေပၚေတာ့ သတိထားဖို႔လိုလိမ့္မယ္ေနာ့္။

ေနာက္ဆံုးနဲ႔ အေရးအႀကီးဆံုးကေတာ့ plagiarism လို႔ေခၚတဲ့ မူပိုင္ခြင့္အလြဲသံုးစားလုပ္ျခင္းပါတယ္။ ရွင္းရွင္းေျပာရရင္ေတာ့ ကူးခ်တာေပါ့။ Plagiarism ဟာ academic field မွာေတာ့ ျပစ္မႈလို႔ေတာင္ေျပာရေလာက္ေအာင္ထိ ျပင္းထန္ပါတယ္။ ပညာေရးနယ္ပယ္မွာ plagiarize လုပ္တဲ့သူကို ေက်ာင္းကနားခိုင္းတာ၊ ေက်ာင္းထုတ္တာ၊ ေက်ာင္းတက္ခြင့္လံုးဝမေပးေတာ့တာ၊ ႏိုင္ငံေရးနဲ႔ ပတ္သတ္တဲ့ စာတမ္းေတြနဲ႔ ၿငိလာတဲ့အခါ တရားစြဲဆိုတာ၊ ေထာင္ဒဏ္၊ ေငြဒဏ္ခ်မွတ္တာအထိ ျပင္းျပင္းထန္ထန္အေရးယူႏိုင္ပါတယ္။

Reference ေပးတဲ့ေနရာမွာလည္း သူ႕စည္းသူ႕ကမ္းနဲ႔လာပါတယ္။ Facebook မွာလို တစ္ေနရာကယူၿပီး credit လို႔တပ္လိုက္တာနဲ႔ မၿပီးသြားပါဘူး။ စာအုပ္နာမည္၊ ေရးသူ၊ ခုႏွစ္၊ ထုတ္ေဝသူ၊ စာအုပ္တိုက္၊ စာမ်က္ႏွာဘယ္ေလာက္၊ ဘယ္ႏွစ္ေၾကာင္းေျမာက္ စသည္ျဖင့္ စည္းမ်ဥ္းအတိုင္းအစဥ္လိုက္ေရးရပါတယ္။ ဒီေနရာမွာ Space bar ေလးတစ္ခ်က္၊ coma ေလးတစ္ခ်က္၊ capital letter, small letter, စာေရးသူ နာမည္ေရးနည္း၊ full stop ေလးတစ္ခုမွ အမွားမခံပါဘူး၊ ေတာ္ေတ္ာေလးကို ၾကပ္မတ္ထားတဲ့ စည္းမ်ဥ္းပါ။ reference အေပးမွားရင္လည္း ေတာ္ေတာ္ရွင္းရမယ့္သေဘာမွာ ရွိတာမို႔ ေသခ်ာေလး သတိထားႏိုင္မွေတာ္ကာက်မယ္ေနာ္။

Related article >>> အဂၤလိပ္လိုကၽြမ္းက်င္ဖို႔ စကားေျပာသင္တန္းေတြ ေစ်းႀကီးေပး တက္ဖို႔လိုသလား

ကဲ… Academic Writing အေၾကာင္းကို သိသင့္သေလာက္ေတာ့ ၿခံဳငံုၿပီး ေဝမွ်ေပးလိုက္ပါၿပီေနာ္။ Academic Writing က မလြယ္ပါဘူး။ ဒါေပမဲ့ စည္းမ်ဥ္း စည္းကမ္းေလးေတြကို ႏွံ႔ႏွံ႕စပ္စပ္သိထားရင္ ေရးတဲ့အခါ အခက္အခဲေတြ ေတာ္ေတာ္ေလ်ာ့သြားႏိုင္ပါတယ္။ ေယာင္းတို႔လည္း သိထားတာေတြရိွရင္ ေဝမွ်ခဲ့ပါဦး။

Myat (For Her Myanmar)

<<< Unicode >>>

အင်္ဂလိပ်စာရေးနည်းအမျိုးမျိုးထဲကမှ Academic Writing ဆိုတာ ဦးနှောက်အစားဆုံး နဲ့ အန္တရာယ်အများဆုံးရေးနည်းဆိုတော့ကာ….

ယောင်းတို့ရေ.. ဒီနေ့အတွက်တော့ ယောင်းတို့အတွက် လုပ်ခန်းခွင်အတွက်ရော ပညာရေးအတွက်ပါ တော်တော်လေးအသုံးဝင်တဲ့ စာရေးနည်းလေးတစ်ခုနဲ့ မိတ်ဆက်ပေးချင်တယ်။ အဲဒါကတော့ Academic Writing တဲ့။ ဘာသာပြန်ရရင်တော့ အဆင့်မီ အင်္ဂလိပ်စာအရေးအသားပေါ့။ ယောင်းတို့ မြင်တွေ့နေကျဖြစ်တဲ့ ဝတ္ထုတွေ၊ ကဗျာတွေ၊ သတင်းစာတွေ၊ ကြော်ငြာ အရေးအသားတွေနဲ့တော့ မတူဘူးပေါ့နော်။ Academic Writing ကို မဟာဘွဲ့အတွက် ပြုစုရတဲ့ စာတမ်းကြီးတွေ၊ လုပ်ငန်းသဘောအရ ရေးရတဲ့ Proposal တွေ၊ သုတေသနစာတမ်းတွေအတွက် သုံးကြပါတယ်။ အထူးသဖြင့် ပညာရေးပိုင်းမှာပေါ့။

Academic writing က ဘာလို့ခေါင်းစားရတာလဲဆိုရင် ဟိုက်ဖန်လေး၊ ဒက်ချ်လေး၊ ကော်မာလေး၊ ဆီမီကော်လုံ အသုံးလေးက အစသတိထားရတယ်။ စကားလုံးအသုံးအနှုန်းရွေးချယ်မှုကလည်း ပညာရှင်ဆန်ရတယ်။ ပြောရရင်တော့ နေ့စဉ်သုံးစကားလုံးတွေသုံးလို့ မသင့်တော်တာပေါ့။ မြင်အောင် ဥပမာပေးရမယ်ဆိုရင် တည်ထောင်သည် ဆိုတဲ့အသုံးမှာ Build ကိုသုံးမယ့်အစား establish ဆိုတဲ့စကားလုံးကို သုံးလိုက်တာမျိုး၊ ငြင်းပယ်သည်ဆိုတဲ့နေရာမှာ refuse ကို သုံးမယ့်အစား decline ဆိုတဲ့စကားလုံးကို သုံးလိုက်ရတာမျိုးတွေပေါ့။ အဓိပ္ပါယ်ကအတူတူပဲ။ အသုံးအနှုန်းပဲကွာသွားတာပေါ့။

Related article >>> အင်္ဂလိပ်လို Presentation လုပ်ကြတဲ့အခါ ဘယ်လို ကြိုတင်ပြင်ဆင်ရမလဲ?

နောက်တစ်ခုက သတိထားရမှာက Academic writing မှာ phrasal Verb လို့ခေါ်တဲ့ verb+preposition အတွဲကို မသုံးမိစေဖို့ပါ။ ဥပမာ Put of the fire အစား extinguish the fire လို့သုံးတာ ပို academic ဆန်တဲ့ သဘောပေါ့။ နောက်ပြီး အတိုကောက်စကားလုံးတွေ – don’t, can’t, I’m, you’re အစရှိသဖြင့် အတိုချုပ်ထားတဲ့ စကားလုံးတွေ သုံးဖို့မသင့်ပါဘူး။ ဆိုတော့ အဲဒါတွေအစား do not, cannot, I am, you are တို့လိုမျိုးပဲ သုံးပေးဖို့ အားပေးပါတယ်။

slang လို့ခေါ်တဲ့ ခေတ်ပေါ်အသုံးတွေကိုကတော့ လုံးဝရှောင်နိုင်လေကောင်းလေပါပဲ။ Academic paper တစ်စောင်မှာ အဲဒီလိုစကားလုံးမျိုးတွေ တွေ့ရတာ အင်မတန်မှ အကျည်းတန်ပါတယ်။ စာဖတ်သူ၊ စာစစ်သူအပေါ်မှာ အလေးမထားဘူးဆိုတဲ့အထိ ကောက်ချက်ဆွဲလို့ရနိုင်တဲ့အထိ သတိထားရမယ့် အသုံးအနှုန်းပါ။ သုံးချင်သပဆိုရင်တော့ Idiom ကို သုံးပေးလို့ရပါတယ်။ ဒါပေမဲ့ အချို့ Idiom အသုံးတွေကလည်း informal ဖြစ်နေဆဲမို့ ကိုယ့်စကားလုံးရွေးချယ်မှုအပေါ်တော့ သတိထားဖို့လိုလိမ့်မယ်နော့်။

နောက်ဆုံးနဲ့ အရေးအကြီးဆုံးကတော့ plagiarism လို့ခေါ်တဲ့ မူပိုင်ခွင့်အလွဲသုံးစားလုပ်ခြင်းပါတယ်။ ရှင်းရှင်းပြောရရင်တော့ ကူးချတာပေါ့။ Plagiarism ဟာ academic field မှာတော့ ပြစ်မှုလို့တောင်ပြောရလောက်အောင်ထိ ပြင်းထန်ပါတယ်။ ပညာရေးနယ်ပယ်မှာ plagiarize လုပ်တဲ့သူကို ကျောင်းကနားခိုင်းတာ၊ ကျောင်းထုတ်တာ၊ ကျောင်းတက်ခွင့်လုံးဝမပေးတော့တာ၊ နိုင်ငံရေးနဲ့ ပတ်သတ်တဲ့ စာတမ်းတွေနဲ့ ငြိလာတဲ့အခါ တရားစွဲဆိုတာ၊ ထောင်ဒဏ်၊ ငွေဒဏ်ချမှတ်တာအထိ ပြင်းပြင်းထန်ထန်အရေးယူနိုင်ပါတယ်။

Reference ပေးတဲ့နေရာမှာလည်း သူ့စည်းသူ့ကမ်းနဲ့လာပါတယ်။ Facebook မှာလို တစ်နေရာကယူပြီး credit လို့တပ်လိုက်တာနဲ့ မပြီးသွားပါဘူး။ စာအုပ်နာမည်၊ ရေးသူ၊ ခုနှစ်၊ ထုတ်ဝေသူ၊ စာအုပ်တိုက်၊ စာမျက်နှာဘယ်လောက်၊ ဘယ်နှစ်ကြောင်းမြောက် စသည်ဖြင့် စည်းမျဉ်းအတိုင်းအစဉ်လိုက်ရေးရပါတယ်။ ဒီနေရာမှာ Space bar လေးတစ်ချက်၊ coma လေးတစ်ချက်၊ capital letter, small letter, စာရေးသူ နာမည်ရေးနည်း၊ full stop လေးတစ်ခုမှ အမှားမခံပါဘူး၊ တော်တေ်ာလေးကို ကြပ်မတ်ထားတဲ့ စည်းမျဉ်းပါ။ reference အပေးမှားရင်လည်း တော်တော်ရှင်းရမယ့်သဘောမှာ ရှိတာမို့ သေချာလေး သတိထားနိုင်မှတော်ကာကျမယ်နော်။

Related article >>> အင်္ဂလိပ်လိုကျွမ်းကျင်ဖို့ စကားပြောသင်တန်းတွေ ဈေးကြီးပေး တက်ဖို့လိုသလား

ကဲ… Academic Writing အကြောင်းကို သိသင့်သလောက်တော့ ခြုံငုံပြီး ဝေမျှပေးလိုက်ပါပြီနော်။ Academic Writing က မလွယ်ပါဘူး။ ဒါပေမဲ့ စည်းမျဉ်း စည်းကမ်းလေးတွေကို နှံ့နှံ့စပ်စပ်သိထားရင် ရေးတဲ့အခါ အခက်အခဲတွေ တော်တော်လျော့သွားနိုင်ပါတယ်။ ယောင်းတို့လည်း သိထားတာတွေရှိရင် ဝေမျှခဲ့ပါဦး။

Myat (For Her Myanmar)

No Comments Yet

Comments are closed