လက်မထပ်ခင် ဆွေးနွေးတိုင်ပင်

ယောင်းတို့ရဲ့ လက်တွဲဖော်နဲ့ ဒါတွေ တိုင်ပင်ပြီးပြီလား

ယောင်းရေ… ချစ်သူနှစ်ဦးသစ္စာမပျက် ချစ်ခြင်းတွေခိုင်မြဲဖို့ ချစ်သူဘဝကနေတစ်ဆင့် တက်လို့ အိမ်ထောင်သည်ဘဝကို တည်ဆောက်ဖို့ စပြီး စဉ်းစားတော့မယ်ဆိုရင် ယောင်းရဲ့ချစ်သူနဲ့ ဆွေးနွေးတိုင်ပင် ညှိနှိုင်းသင့်တဲ့ အကြောင်းအရာလေးတွေကို မျှဝေပေးချင်တယ်ယောင်းရေ

တစ်ဦးနဲ့တစ်ဦး အပြန်အလှန် ပွင့်ပွင့်လင်းလင်းပြောကြရမယ်နော်
ချစ်သူဘဝဆိုတော့ ပျော်ရွင်ကြည်နူးစရာလေးတွေနဲ့ ဖြတ်သန်းခဲ့ရပေမယ့် တကယ့်လက်တွေ့အိမ်ထောင်သည်ဘဝကို ဖြတ်သန်းမယ်ဆိုရင်တော့ မိသားစုအရေး၊ ကိုယ့်ရဲ့ပြဿနာအကြောင်းတရားတွေကို သူလည်းသိစေဖို့အတွက် ပွင့်ပွင့်လင်းလင်းပြောဆိုရမယ် ယောင်းရေ။ ဒါမှ သူ့အတွက်ရော ယောင်းအတွက်ပါ ဘာတွေကြိုတင်ပြင်ဆင်ရမလဲ ဖြေရှင်းရမယ့် ပြဿနာတွေကို ဖြေရှင်းနိုင်မှာပေါ့။ ယုံကြည်အားကိုးပြီး ပွင့်ပွင့်လင်းလင်း ဆွေးနွေးတိုင်ပင်တဲ့ယောင်းကို ယောင်းရဲ့ချစ်သူကလည်း ပိုပြီးအချစ်တိုး ယုံကြည်စိတ်ချမှု အပြည့်အဝရစေနိုင်တာပေါ့နော်။

နားလည်မှုနဲ့ လက်တွဲရမယ်
နားလည်မှုဆိုတာက လူတိုင်းမှာလိုအပ်ပါတယ်။ နားလည်မှုလွဲပြီး အိမ်ထောင်သည်ဘဝရောက်မှ စိတ်ညစ်ရတဲ့ အိမ်ထောင်ရေးတွေကို မကြာခဏမြင်တွေ့နေရတာမျိုးတွေလည်း ရှိပါတယ်။ ကိုယ့်အိမ်ထောင်ဘက်နဲ့ လက်မတွဲခင် နားလည်မှုယူထားတာက အကောင်းဆုံးပေါ့ယောင်းရေ။ ဥပမာအနေနဲ့ပြောရရင် အားတဲ့ရက်တွေမှာ အခန်းသန့်ရှင်းရေးကို အတူတူလုပ်စေချင်တာမျိုးကို သူနားလည်အောင် ပြောပြပြီး  တစ်ခါတည်းနားလည်မှုယူထားရပါမယ်။ ကိုယ်လိုတာတွေ ပြောပြသလို သူ့ရဲ့လိုအပ်ချက်လေးတွေ၊ လိုချင်မှုလေးတွေကိုလည်း နားလည်ပေးတတ်အောင် ဖြည့်ဆည်းပေးနိုင်အောင် ကြိုးစားပါယောင်းရေ ဒါမှ ချစ်ခြင်းအပြည့်နဲ့သာယာတဲ့ဘဝလေးဖန်တီးနိုင်မှာနော်။

Related Article >>> ချစ်သူစုံတွဲတွေ လက်မထပ်ခင် ကြိုတင်တိုင်ပင်ဆွေးနွေးသင့်သည့် အကြောင်းအရင်း(၅)မျိုး

ဘဏ္ဍာရေးကို စနစ်တကျစီမံပါ
ဒီလိုငွေကြေးဆိုတဲ့နေရာမှာ ယောင်းအတွက်တော့ နှစ်ခုလောက်ခွဲပြောရလိမ့်မယ်ယောင်းရေ။ ငွေကြေးဆိုတာက ဘာရယ်မဟုတ် သေးသေးလေးတွေကနေ  ပြဿနာတော်တော်ကြီးလာတတ်တဲ့ အစိတ်အပိုင်းမှာပါတယ်နော်။ လက်ထပ်ဖို့ စုဆောင်းရမယ့်ငွေကြေးရယ်၊ လက်ထပ်ပြီးအတူနေတဲ့အခါ သုံးစွဲရမယ့်ငွေကြေးရယ်ကို ဆိုလိုတာယောင်းရေ။ လက်မထပ်ခင်မှာ ဘယ်လိုပုံစံ လက်ထပ်ပွဲကို ကျင်းပမှာလဲ၊ (ကြော်ငြာဝင်လိုက်မယ်နော်… နောက်အပိုင်းတွေမှာ လက်ထပ်ပွဲနဲ့ သက်ဆိုင်တဲ့ အကြောင်းအရာတစ်ခုချင်းစီကို တင်ပေးသွားမှာပါ) အတူတူစုဆောင်းကြမှာလား။ ဒါမှမဟုတ် လက်ထပ်ဖို့ ငွေကြေးအဆင့်သင့်ဖြစ်ပြီလား။ ဒါတွေကို နှစ်ယောက်အတူတူတိုင်ပင်ရမယ် ယောင်းရေ။ အိမ်ထောင်သည်ဘဝ ရောက်တဲ့အခါ အိမ်မှုကိစ္စ၊ စားဝတ်နေရေးအတွက် လိုအပ်လာမယ့် ငွေကြေးတွေကို အမျိုးသမီးဖြစ်တဲ့ ယောင်းက ဘယ်လောက်လိုအပ်ချက်ရှိမယ် အတူတူရှိနေတဲ့လစာကို ဘယ်လောက်စုပြီး ဘယ်လိုသုံးကြမလဲဆိုတဲ့အရာတွေကို ဒီအခြေအနေမှာ တိုင်ပင်ထားမှ မလိုလားအပ်တဲ့ပြဿနာတွေကို ဖြေရှင်းပြီးသားဖြစ်မှာပါယောင်းရေ။

မိသားစုအခြေအနေကို သေချာဆွေးနွေးပါ
အိမ်ထောင်ပြုတော့မယ်ဆိုရင် တစ်မိသားနဲ့တစ်မိသားပေါင်းစည်းရမှာဆိုတော့ မိသားစုနှစ်စုတွေ့ဆုံပေးသင့်တယ်။ ယောင်းကလည်း သူ့မိသားစုအခြေအနေ၊ ဘာတွေကြိုက်တတ်လဲဆိုတာကိုပါ သိထားသင့်တယ်။ ဥပမာပြောရရင် သူ့ရဲ့ အမေမွေးနေ့လေးကို ယောင်းက မှတ်မှတ်ရရနဲ့ လုပ်ပေးတယ်ဆိုပါတော့။ သူ့မိသားစုအပေါ်ယောင်းထားတဲ့ စိတ်ထားလေးက သူ့အတွက်တော့ အချစ်တွေတိုးပြီးအမြတ်တနိုးဖြစ်စေမှာပါ။ သူကလည်း ယောင်းရဲ့မိသားစုအပေါ်တန်ပြန် သက်ရောက်မှုရှိစေမှာ သေချာပါတယ်…။ အရေးအကြီးဆုံးက မိသားစုနှစ်စုကို ပြေပြေလည်လည်နဲ့ အဆင်ပြေအောင် ညှိနှိုင်းပေးဖို့ပဲနော်။

မိသားစု အစီအစဉ်ကို ကြိုပြီးတိုင်ပင်ပါ
ချစ်သူဘဝက ညနေအိမ်ပြန်ခဏတာ လမ်းခွဲရပေမယ့် အိမ်ထောင်သည်ဖြစ်သွားရင်တော့ ဘယ်မှာနေမယ်၊ ဘယ်သူတွေနဲ့အတူနေမယ်၊ နှစ်ကိုယ်တူအတူတူ သီးသန့်နေမလား၊ ဒါမှမဟုတ် မိဘတွေနဲ့နေရမလား စတာတွေကို တိုင်ပင်ထားရမယ်နော်။ ဒီထက်အရေးကြီးတာက လက်ထပ်ပြီးရင် သားသမီးရတနာဆိုတာ ကိုယ့်ဆီကိုရောက်လာမှာပဲ ဒီတော့ မိသားစု Plan လေးက အရမ်းကိုအရေးကြီးတဲ့ တစ်စိတ်တစ်ဒေသထဲမှာပါတယ်နော်။ သားသမီးဘယ်နှစ်ယောက်ယူမလဲ၊ ဘယ်နှနှစ်ကြာမှ ကလေးယူမလဲ၊ စတာတွေကို ပွင့်ပွင့်လင်းလင်းပြောဆိုထားမှ ယောင်းအတွက် ကြိုတင်ကာကွယ်သင့်တာတွေကို ပြင်ဆင်လို့ရမှာနော်။

နှစ်ယောက်လုံးရဲ့ ကျန်းမာရေး ပြဿနာတွေကို အပြန်အလှန် သိထားသင့်ပါတယ်
ကျန်းမာရေးဆိုတာက လူတစ်ယောက်မှာအရေးအကြီးဆုံးပဲလေ.. ဒါကြောင့် လက်မထပ်ခင်မှာဆေးစစ်တာ။ ကျန်းမာစစ်ဆေးတာတွေက အရမ်းကောင်းတဲ့ ကိစ္စတစ်ခုပါပဲ။ ယောင်းမှာရှိနေတဲ့ ဖြစ်တတ်တဲ့ရောဂါလေးတွေကို သူသိထားရင် တစ်ခုခုဖြစ်လာတဲ့အချိန်မှာ သူချက်ချင်းဖြေရှင်းပေးနိုင်မယ်။ သူ့ရဲ့ ကျန်းမာရေးအကြောင်းကို ယောင်းသိထားရင်လည်း ယောင်းအနေနဲ့ သင့်တော်တဲ့အစားအစာတွေ ချက်ပြုတ်ပေးနိုင်သလို၊ တစ်ခုခုဖြစ်လာမှာ ပူစရာမလိုဘဲ ချက်ချင်းဖြေရှင်းနိုင်တာပေါ့။

ဒီလိုအကြောင်းတရားလေးတွေကို လက်မထပ်ခင်မှာ ယောင်းချစ်သူနဲ့ သေသေချာချာဆွေးနွေးတိုင်ပင်ထားမှ  ရွှေလက်တွဲပြီး ချစ်ပွဲဝင်နိုင်မယ့် သာယာပျော်ရွှင်တဲ့ အိမ်ထောင်သည်ဘဝလေးကို ပိုင်ဆိုင်နိုင်မှာပါယောင်းရေ။

အဆင်ပြေနိုင်ကြပါစေနော်…

May ( For Her Myanmar )

error: Content is protected !!